O Negreira segue na loita pola permanencia
Importante victoria do Negreira no Campo do CF Noia esta fin de semana.
Non lle saíu mal a xogada aos nicrarienses, que debuxaron un partido de trincheira, táctico, que decidiu Quintairos na segunda metade. O seu gol, tras un zapatazo cargado de violencia, foi suficiente para sumar tres puntos e deixar ao Noia, que tivo unha decena de ocasións para empatar, con cara de circunstancias. O balón quedou coas ganas de bicar a rede defendida por Rodri. Que o choque non ía ser unha oda ao fútbol de salón podíase prever antes de que o colexiado pitase o inicio. Nin Negreira nin Noia estaban dispostos a regalar absolutamente nada ao seu rival, coñecedores da súa situación na táboa. Foi así como ambos optaron por obviar a saída de balón en curto. Adán, por parte dos nicrarienses, e Stefan, polos locais, convertéronse no obxectivo de todos os balóns aéreos. Quintairos demostrou que ía ser determinante en cada balón que recibía. Hábil de costas, e de gatillo fácil, foi un pesadelo para a zaga local. Con máis guerra que fútbol durante a primeira metade, foi o Noia o que tivo as ocasións máis claras para adiantarse no electrónico. A primeira, no minuto 23, cando Tachi cabeceou un bo centro de Hugo. A defensa, in extremis, despexou como puido. Pancho respondeu para os visitantes no 28, aínda que o seu disparo saíu demasiado centrado. Antes de tomar o camiño dos vestiarios, Stefan rozou o 1-0, aínda que, de novo, a zaga achicou o balón cando ía directo á rede.
